資產規劃金字塔係一種循序漸進嘅理財概念，目標係根據唔同投資理財產品嘅風險同回報特性，將資產分配到唔同層級，以達到穩健嘅財務管理目標。呢種方法通常會將資產分為四個主要層級，每個層級代表唔同嘅風險同回報水平。
筆者將種類繁多的理財投資產品分為四個層級投機、財富增值、累積財富、保障：
- 最底層：基本保障，包括基本收入同醫療類型嘅保險。
- 第二層：累積到一定比例的財富後，可以考慮風險較底定期存款
- 第三層：風險較高嘅投資產品，例如股票、ETF同債券。
- 最高層：衍生金融產品
最底層：現金嘅靈活性同固定收入嘅重要性，用嚟應付日常生活支出同突如其來嘅額外支出（例如意外）。呢層必須優先處理，防止喺財富增值時因為需要應付其他額外支出而受到影響。建議預留6-12個月嘅應急預備金，配置適當嘅保險，例如醫療、危疾同人壽保險。儲蓄類保險就唔建議，因為一般年期較長，靈活性低。購買保單時要認真了解內容，唔好超預算，基本上就足夠應對失業同突如其來嘅醫療費用。
*（利申：非保險從業員）
第二層：開始將財富放喺一些低風險嘅理財產品，製造穩定嘅被動收入。銀行嘅定期存款係一個好嘅工具，雖然回報唔高，大約3厘左右（截至2024年8月），但係非常穩定。
第三層：開始涉及具投資成份嘅產品，例如基金、股票、房地產同債券。債券風險較低，目標係跑贏通脹。之後會有一個系列專門講解股票市場。
最高層：衍生性金融商品，係一種特殊類別嘅金融商品統稱，主要包括期貨、期權同虛擬貨幣。呢類產品結構複雜，風險相對較高。
可以總結嚟講，整個資產管理可以幻想成起樓，地基必須打好，循序漸進咁慢慢蓋上去，樓就會穩陣。
